Mirari Arando / Aisialdia

Mirari Arando Ilarduia nauzue (Aretxabaleta, 1982). Formazioz Psikologian lizentziatua eta hezkuntzaren psikologia arloan espezializatua naiz. Heziketa sexuala eta aholkularitza sexologikoan aditu izateko Sexologiako masterra amaitzen ari naiz eta Haur Hezkuntzan irakasle izateko ikasketak burutzen ekin berria.

Egun, Arrasateko Udaleko sexologia Zerbitzuan eta ACABE Anorexia eta Bulimiaren aurkako elkartean egiten dut lan. Dena den, 15 urte nituela hasi nintzen aisialdiko begirale eta kirol begirale lanetan. Ondoren, klase partikularrak ematen, tabernari lanetan eta dendari gisa ere ibilia naiz. 2005 urte amaieran, Arrasateko ikastetxeetako L.M.H 6.mailako haurrekin Hezkuntza Sexuala lantzeko aukera izan nuen. Baina 2006ko hasieran atzerrian praktikak egiteko programarekin Argentinara egin nuen ihes eta Patagoniako herri txiki bateko auzo batean orientatzaile lanak eta ikastetxeko psikologa, orientatzaile eta hezitzaile lanak burutu nituen. Hau amaitu eta Buenos Airesera joan nintzen bertako psikiatrikoetan bolondres gisa lan egin eta Haur Garapeneko ikastaro bat egitera. Aberrira bueltatzeaz bat, Txikilandiako ludotekako begirale eta Txatxilipurdik Eskoriatzan duen Gazte Txokoan hezitzaile lanetan hasi nintzen. Ondoren, AEDn eta Umezaintzan egin nuen lan eta 2008 hasieran Sexologia Zerbitzuan hasi nintzen.  

Txatxilipurdi eta Goienak  sortu berri duten egitasmo honetan sexualitateari buruz jarduteko aukera eman digute, gaiaren inguruan ditugun kuriositate, zalantza, ekarpen eta bestelakoak denon artean argitzeko eta haur eta gazteen sexualitate osasuntsua bultzatzeko asmoz.  Besterik gabe, elkarrekin asko ikasiko dugulakoan, laster arte!