Zerga sistema izango dute aztergai DBHko gipuzkoarrek
Gipuzkoa osoan, guztira 19 ikastetxek hartuko dute parte Gipuzkoako Foru Aldundiaren proiektuan.
Iazko ikasturtean Gipuzkoako Ikastola, Kristau Eskola zein Eskola Publikoko bina ikastetxetan fiskalitatea lantzeko unitate didaktikoa landu zuten proba pilotu gisa. Ikastetxeok esperientziaren balorazio “oso ona” egin zuten, eta datozen ikasturteetan proiektuarekin aurrera egiteko nahia azaldu zuten. Horien artean izan zen Oñatiko Txantxiku ikastola, eta unitate didaktikoaren diseinuan ere hartu zuten parte.
Nagore Altubek Andoni Zendoiarekin batera egin zuen lan proiektuaren diseinuan eta horrela gogoratzen ditu hastapenak: “Mondragon Unibertsitatetik HUHEZIko arduradunak Txantxiku ikastolara etorri zen Gipuzkoako Foru Aldundiko eskaintza honetan gure kooperazioa eskatuz. Proposamena hasieratik interesgarria iruditu zitzaigun eta aurrera egin genuen proiektuarekin”.
Zergen eta zerbitzu publikoen inguruan ikasleen kontzientziazio maila areagotzeko helburuz abiatu dute ekimena, Gipuzkoako Diputazioko Ogasun departamenduaren laguntzaz. Besteak beste, zergak zer diren eta nola kalkulatzen diren ezagutuko dute ikasleek. Era berean, zergen ordainketatik eratorritako zerbitzuak zeintzuk diren ere ikasiko dute, baita iruzur fiskala zer den eta zein eragin dituen ere. Altubek azken alor hau ezagutzea “ezinbestekoa” dela azpimarratu du.
Hezkuntza, iruzurraren aurka
Zerga heziketako arduradun den Isidro Esnaolak argi du zerga iruzurraren aurkako borrokan, ikuskaritza bezain garrantzitsua dela hezkuntza. Azaldu duenez, ildo horretatik abiatu zen proiektua “zergak zergatik ordaintzen diren eta ongizate estatua nondik datorren azaltzea” baitzen helburua.
Eskoletan zegoen “hutsuneari” erantzuteko sortu zuten unitate didaktikoa, “gaiari buruzko hausnarketa bultzatu nahi genuen ikasleengan” dio Esnaolak. Izan ere, sentsibilizazioarekin, etorkizuneko gizarteko iruzurraren arazoa sustraietatik moztea espero dute.
Esnaolak aitortu du, oraingoz unitate didaktikoa baino ez den arren, gaia curriculumean txertatzea gustatuko litzaiekeela, baina erabaki hori hezkuntza komunitatearen esku utzi behar dela.
Argazkiaren iturria hemen.