Hainbat sendagilek haurdunaldian katuez desegiteko gomendioa egiten dute. Ekiñe Aizpurua albaitariak ez du beharrezkoa ikusten, eta ez kutsatzeko hartu beharreko neurriak zeintzuk diren azaldu du ‘Sabeletik mundura’ atarian.

Imagen 7

Aizpuruaren ustez haurdunaldian katua gertu izatea zenbateraino izan daitekeen arriskutsua ulertzea ezinbestekoa da. Adierazi du kutsatze prozesua ia ezinezko bihurtzeraino murriztu daitekeela neurri egokiak hartuz gero.

Jakin behar dugu parasitoa odolaren bidez iristen da fetuarengana eta gaixotasun larriak sor ditzakeela —hidrozefalia, itsutasuna, garapen arazoak…—

Toxoplasmosiak arazo larriak sor ditzake. Ondoriorik larrienak haurdunaldiko lehen hilabeteetan izaten dira —hidrozefalia edo abortua, esaterako—. Kutsatze arrisku handiena, ordea, haurdunaldiaren bigarren hiruhilekotik aurrera izan ohi da (%60). Aizpuruak, dena den, honakoa dio: “Gure katua etxean badabil eta pentzua jaten badu, oso zaila da toxoplasmosiaz kutsatzea, eta hala izanda ere, bere gorotzen ondorioz gu kutsatzea ia ezinezkoa da higiene neurri egokiak jarraituz gero. Lehenago kutsatuko gara ondo egosi gabeko haragia edo ondo garbitu gabeko barazkiak jateagatik”.

Haurdunaldia aurretik kutsatuak izan bagara ez dugu haurrarekiko arriskurik izango, gure gorputzak gaixotasunarekiko inmunitatea garatua izango baitu.

 

Kutsatze prozesua

* Inguruko lurrak eta urak katuen gorotzen bidez kutsatzen dira. Gainerako animaliak inguruko ur kutsatuak edatean kutsatzen dira. Katuak zein gizakiok kutsatutako animalia horien haragi gordina edo gaizki egosia jaterakoan kutsatzen gara.

* Katuen gorotzek kutsatutako uren bitartez kutsa daitezke inguruko barazkiak eta fruituak.

* Katua etxetik kanpo ibiltzen bada —ehizan eta ur kutsatuetatik edaten— arrisku handiagoa du, baina aldi berean gorotzak kanpoan egingo ditu, beraz guretzat arrisku gutxiago.

* Kutsatuak diren lehen aldian bakarrik askatzen da parasitoa gorotzetan, eta 2-3 astez.

* Parasitoak ez du gaitasun kutsakorra lortzen 1-5 egun gorotzetan pasa arte.

Neurriak

* Ez jan haragi gordinik edo jan aurretik izoztu. Gainera, ondo egosi jan beharreko haragi guztia: 65ºC-tik gora 10 minutuz baino gehiagoz.

* Katuen gorotzak eskuekin ikutzeak edo gorotzak egon diren lur nahiz hondarra ukitu eta eskuak garbitu gabe ahora eramatea da kutsatzeko azken modua.

* Kontuz ibili baratzeko lanetan edo lorezaintzan. Saihestu katuen gorotzez kutsatuta egon daitezkeen urak erabiltzea eta jan aurretik ondo garbitu barazki eta fruitu gordinak.

* Elikagai gordinak eskuartean izatean edo lurrarekin kontaktua dugun uneetan eskularruak erabili beharko genituzke, eta ostean eskuak ondo garbitu.

* Ahal den moduan murriztu katuaren irteerak etxetik kanpo, edo harekiko kontaktua etxetik kanpo badabil.

* Katuaren elikadura zaindu. Haragi gordinik eta paterik ez.

* Kendu egunero katuaren gorotzak hondarretik. Eskularruak eta maskara jantzi dezakezu lasaiago jarduteko. Hondarraren ontzia garbitu behar dugun bakoitzean ontzia ur irakinetan murgildu eta ur beroz garbitu.

* Katuarekin jolasean jardun ondoren eskuak garbitu.

* Katuari ere, guri bezalaxe, odol froga egin diezaiokegu eta gorotzen analisi bat guztiz ziur izateko. Edonola ere, kokzidioen aurkako tratamendua eta antibiotikoa eman diezaiokegu katuari baiezkoa izan bada emaitza.

 

Artikuluaren iturria hemen. 

 

Argazkiaren iturria hemen.