Gurasolandia festa antolatu du Arrasateko Txatxilipurdi elkarteak azaroaren 15erako.

Gurasolandia familiendako jolas parke bat da, haur eta helduen arteko aisialdi harremana sustatzeko gunea. Horretarako ekintza eta tailer ezberdinak egongo dira, familiartean ondo pasatzu eta jolastuz, abestuz, parte hartuz, gozatuz, kontatuz ... gaitasunen eta hizkuntzaren transmisioa emanez.

Gurasoendako jaia

Gurasolandia nagusiki gurasoei zuzenduta dago, nahiz eta haurren parte-hartzea ere garrantzitsua izango den. Guraso esatean, hala ere, etxeko edozein heldu esan gura dute Txatxilurpi elkarteko kideek, hala nola: izeba, gertuko lagun bat edo aitita, esate baterako.

Haurrak ezingo dira jaialdira bakarrik joan, gutxienez heldu batekin joan beharko dira. Modu horretara, ekintza ezberdinetan bilatzen den transmisioa bermatuko dela ziurtatzen dute antolatzaileek. Helduak aldiz, bakarrik joateko aukera izango dute.

Helburua

Gurasolandia egitasmoaren helburua da ikuslea parte-hartzaile bihurtzea; hau da, normalean begira egoten den helduak, egunean zehar egingo dituzten ekintzetan parte hartzeko aukera izatea, jaialdiko protagonista bilakatuz. Egitasmoaren helburua da haur eta gurasoak transmisioarekin lotura zuzena duten ekintzetan elkarrekin parte hartzea. Aldi berean, rol aldaketa lortzea ere gura du Gurasolandia jaiak, gurasoak haur bilakatzea ordu batzuetan ez bada ere.

Euskararen transmisioan familiaren papera funtsezkoa da. Funtzio garrantzitsu hori aitortzen diote familiari hizkuntzalari eta soziolinguistika adituk, belaunaldi arteko hizkuntza transmisioaren giltza izatearena. Txatxilipurdi Elkarteak ere aspalditik du argi gurasoekin lana egin behar dela.

Egitaraua

Gurasolandia azaroaren 15ean egingo dute, Arrasateko Uarkape pilotalekuan.

• 11:00etatik 14:00etara: euskarazko jostailuen gunea, marrazketa gunea, karaokea, psikomotrizitatea eta aerobitona egingo dituzte.
  
• 16:30etik 19:30era: ipuin-kontaketa, euskarazko abesti eta jolasak, txapa tailerra, jolas tradizionalak eta dantzaldia.
• Hankapaloak, balanze-bikeak, ludoteka eta teknologia berrien gunea ere egongo dira egun guztian.