Espainiako Gobernuko Hezkuntza ministroak berretsi du Derrigorrezko Bigarren Hezkuntzari, lau ikasturteetatik bat kenduko diotela. Batxilergoari berriz, urtebete gehituko diote.

Espainiako Gobernuak aurten onartu nahi du legea eta 2013-2014 ikasturtean abian jarriko luke. Kongresuan gehiengo osoa du PPk, eta beraz, badakite legea onartzea ziurtatuta daukatela. DBHri ikasturte bat kendu arren, Hezkuntza ministroak adierazi du gazteek 16 urtera arte segi beharko dutela derrigorrez eskolara joaten. Hori nola gauzatuko den ez du azaldu, izan ere, DBHren segidakoak batxilergoa eta Lanbide Heziketa dira eta horiek borondatezkoak dira.

Oraingo ezaugarriak aldatzen ez badira, ikasleek Lanbide Heziketan edo batxilergoan hasi beharko dute derrigorrez ikasten eta hurrengo urtean, nahi izanez gero, utzi. Hezkuntza komunitateak ez du begi onez ikusi aldaketa.